കണ്ണട

====================================

രചന : മുരുകന് കാട്ടാക്കട

====================================

എല്ലാവര്ക്കും തിമിരം നമ്മള്ക്കെല്ലാവര്ക്കും തിമിരം

മങ്ങിയ കാഴ്ച്ചകള് കണ്ടു മടുത്തു

കണ്ണടകള് വേണം കണ്ണടകള് വേണം

രക്ത്തം ചിതറിയ ചുവരുകള് കാണാം

അഴിഞ്ഞ കോല ക്കോപ്പുകള് കാണാം

കത്തികള് വെള്ളിടി വെട്ടും നാദം

ചില്ലുകളുടഞ്ഞു ചിതറും നാദം

പന്നിവെടിപ്പുക പൊന്തും തെരുവില്

പാതിക്കാല് വിറകൊള്വതു കാണാം

ഒഴിഞ്ഞ കൂരയില് ഒളിഞ്ഞിരിക്കും

കുരുന്നുഭീതി ക്കണ്ണുകള് കാണാം

മങ്ങിയ കാഴ്ച്ചകള് കണ്ടു മടുത്തു

കണ്ണടകള് വേണം കണ്ണടകള് വേണം

സ്മരണകുടീരങ്ങള് പെരുകുമ്പോള്

പുത്രന് ബലിവഴിയെ പോകുമ്പോള്

മാതൃവിലാപത്താരാട്ടില്

മിഴി പൂട്ടിമയങ്ങും ബാല്യം

കണ്ണില് പെരുമഴയായ് പെയ്തൊഴിവതു കാണാം

മങ്ങിയ കാഴ്ച്ചകള് കണ്ടു മടുത്തു

കണ്ണടകള് വേണം കണ്ണടകള് വേണം

പൊട്ടിയ താലിച്ചരടുകള് കാണാം

പൊട്ടാ മദ്യക്കുപ്പികള് കാണാം

പലിശ പ്പട്ടിണി പടികേറുമ്പോള്

പുറകിലെ മാവില് കയറുകള് കാണാം

തറയിലൊരിലയിലൊരല്പ്പം ചോരയില്

കൂനനുറുമ്പിര തേടല് കാണാം

മങ്ങിയ കാഴ്ച്ചകള് കണ്ടു മടുത്തു

കണ്ണടകള് വേണം കണ്ണടകള് വേണം

പിഞ്ചു മടിക്കുത്തന്പതുപേര് ചെര്ന്നിരുപതുവെള്ളി -

ക്കാശുകൊടുത്തിട്ടുഴുമറിക്കും കാഴ്ച്ചകള് കാണാം

തെരുവിന് സ്വപ്നം കരിഞ്ഞ മുഖവും

നീട്ടിയ പിഞ്ചു കരങ്ങള് കാണാം

അരികില് ശീമ കാറിന്നുള്ളില്

സുഖശീതള മൃദു മാറിന് ചൂരില്

ഒരുശ്വാനന് പാല് നുണവതു കാണാം

മങ്ങിയ കാഴ്ച്ചകള് കണ്ടു മടുത്തു

കണ്ണടകള് വേണം കണ്ണടകള് വേണം

തിണ്ണയിലന്പതു കാശിന് പെന്ഷന്

തെണ്ടി ഒരായിരമാളെ ക്കാണാം

കൊടിപാറും ചെറു കാറിലൊരാള്

പരിവാരങ്ങളുമായ് പോവതുകാണാം

മങ്ങിയ കാഴ്ച്ചകള് കണ്ടു മടുത്തു

കണ്ണടകള് വേണം കണ്ണടകള് വേണം

കിളിനാദം ഗതകാലം കനവില്

നുണയും മൊട്ടക്കുന്നുകള് കാണാം

കുത്തിപ്പായാന് മോഹിക്കും പുഴ

വറ്റിവരണ്ടു കിടപ്പതു കാണാം

പുഴ വറ്റിവരണ്ടു കിടപ്പതു കാണാം

വിളയില്ല തവളപാടില്ലാ

കൂറ്റന് കുഴികള് കുപ്പത്തറകള്

മങ്ങിയ കാഴ്ച്ചകള് കണ്ടു മടുത്തു

കണ്ണടകള് വേണം കണ്ണടകള് വേണം